薛凱琪早前在旺角朗豪坊活動遇襲，前額被扑致凹陷，昨日重臨肇事現場，由3名保安員成「品字陣」和舅父護航，惜聲勢大不如前，全被「叮界女神」Janice Man蓋過，她即主動破陣上前握手簽名挽人氣！ 薛凱琪（Fiona）於上月23日出席在旺角朗豪坊舉行的活動時，遇「掟樽怪客」襲擊，前額被五花茶膠樽扑中致凹陷，她事後接受訪問時不禁痛哭。事隔一個月後，她昨日重臨舊地，與梁雨恩、Janice Man及HotCha等出席《朗豪坊X川端英樹星座雕塑展啟動儀式》，大會煞有介事地在室內搭建有蓋帳篷作休息室，並加強保安。Fiona出動舅父兼經理人Peter傍住，另加3名保安以「品字陣」護航，認真大陣仗！ Fiona否認要求加強保安，並揚言沒有怯場：「唔驚，個別事件！我份人好易受影響，所以事前不斷叫自己要克服。」她又笑說：「舅父識氣功嘛！再有事就匿佢身後避難！其實保安數目同上次差唔多，上次（膠樽）飛得咁快，大家唔係龍門，點擋到！」然而當她走近圍欄替Fans簽名和合照時，下意識左顧右盼，顯得猶有餘悸，似乎仍擔心隨時再有飛樽空降。她將於下月11日為遇襲事件上庭作供，問到會否為狂迷求情？她說：「唔知上庭要講咩，先向律師諮詢意見，呢次係刑事案，控告與否由警方決定。」她表示未有收過該狂迷的求情信，雙方亦沒有接觸。
被Janice Man搶風頭
現場吸引逾百歌迷和途人圍觀，非常墟！Fiona雖然是傳媒焦點，但聲勢卻不及「叮界女神」Janice Man強勁，其Fans更晨早到場霸定前排有利位置，而Fiona的Fans被擠出外圍，惟有在後排高舉海報吶喊助威，儀式結束後，Fiona即主動行近圍欄替他們簽名合照，挽回人氣。 對於Fiona上月在該商場遇襲，Janice Man認為這次只是意外，亦戥Fiona無辜：「我Fans冇惡意、好乖，唔需要加強保安，我同佢成日都有溝通，叫佢要守秩序。Fans之間少不免有碰撞，大家冇惡意。我有個9歲Fans，好擔心咁逼人易生意外，所以成日提醒佢公眾場合要小心，我自己亦會提高警覺。」
